Nágrenni hótelsins
Í nágrenni hótelsins er náttúrufegurð mikil og veðurfar milt. Náttúru- og útivistarunnendum bjóðast nær óþrjótandi möguleikar á lengri eða skemmri ferðum. Starfsfólkið er ávallt reiðubúið að aðstoða ferðalanga við að panta í skipulagðar ferðir.
Af áhugaverðum stöðum má nefna Systrastapa, Systravatn, Landsbrotshóla, Fjarðarárgljúfur og Dverghamra. Á sumrin er boðið upp á dagsferðir með leiðsögn á heilmarga staði.
Skeiðarársandur
Ekið er út á Skeiðarársand og stoppað þar. Möguleiki er á ferð í Skaftafell á leiðinni til baka.
Lakagígar
Ekið frá Kirkjubæjarklaustri, inn í Lakagíga og dvalið þar í u.þ.b. 3 klukkustundir. Lakagígar eru um 25 km löng gígaröð á Síðumannaafrétti en þeir gusu 1783. Gígarnir eru úr svörtu og rauðu gjalli, hraunkleprum og hraunsteypu. Gígarnir eru flestir 20 til 50 metra háir en þeir stærstu ná um 100 metra hæð.
Núpsstaðaskógur
Ekið frá Klaustri að morgni og gera má ráð fyrir að þessi ferð taki allt upp í 8 tíma. Núpsstaðaskógur er fagurt kjarrlendi í hlíðum Eystrafjalls fyrir vestan Skeiðarárjökul. Skammt er til Súlutinda sem rísa ægibrattir vestan Skeiðarárjökuls. Í ferðinni er hægt að fara upp á Kálfstind en þar verður að handstyrkja sig upp á festi sem liggur upp klettabeltið.
Skaftafell - Jökulsárlón
Ekið frá Klaustri í Skaftafell þar sem gengið er um í þjóðgarðinum og m.a. upp að Svartafossi. Síðan er ekið austur Öræfasveit að Jökulsárlóni þar sem hægt er að fara í siglingu á Lóninu.
Ingólfshöfði
Ekið frá Klaustri að Hofsnesi þar sem Sigurður bóndi tekur við hópnum og flytur hann út í Ingólfshöfða. Einnig er hægt að hafa viðdvöl í Skaftafelli og á Jökulsárlóni.
Kirkjubæjarklaustur
Er í 3km fjarlægð og er næsti þéttbýliskjarni.
Göngu og skoðunarferðir
Daglegar skoðunarferðir yfir sumarið meðal annars í Laka, Eldgjá , Landmannalaugar og Skaftafell. Gönguleiðir. Geirland er 2 km frá þjóðvegi 1.
